INFO ATUAL, (LIBERDADETL.com) — Unidade Polísia Marítima (UPM) kaptura grupu peskador Indonézia ne’ebé suspeita halo peskas ilegal iha área tasi Uatucarbau no Uatulari, kosta sul Timor-Leste. Operasaun kapturasaun ne’e akontese dader iha loron 18 fulan-Abril tinan 2026, no hala’o ho apoiu hosi ro patrulha NRTL Lusitânia.
Depois kapturasaun, peskador hirak ne’e lori ba Postu Polísia Marítima iha Com, no entrega ba Komandu Polísia Munisípiu Lautém atu kontinua prosesu investigasaun no aplika lei tuir prosedimentu legál. Peskador sira ne’e suspeita tama ilegalmente ba área soberania Timor-Leste ho ro KM Makmur Rejeki Mulya atu halo peskas la ho lisensa.
Operasaun ne’e parte hosi esforsu kontinuadu UPM atu prevene violasaun lei peskas no proteje rekursu natural Timor-Leste. UPM sei kontinua halo patrulha regular iha área fronteira marítima atu garante soberania nasional no seguransa iha tasi.
Iha video ne’ebé viral iha rede sosiál, hatudu momentu kapturasaun peskador sira. Iha video ne’e, membru UPM la uza toa, maibé hakilar ho lian maka’as atu ordena peskador sira para. Observadór sira hateten katak, maski operasaun ne’e hala’o ho profisionál, presiza iha ekipamentu tekniku ruma ne’ebé bele deteta ro ilegal antes tama ba área soberania.
Autoridade sira agora halo koordinasaun atu determina medidu legál kona-ba peskador sira ne’e, inklui konfiskamentu ro no instrumentu peskas. Prosesu legál sei kontinua tuir lei Timor-Leste kona-ba peskas ilegal iha área marítima nasional.
Kapturasaun ne’e reforsa mensajen governu kona-ba kompromisu forte atu defende rekursu natural, soberania teritóriu, no lei Timor-Leste iha área tasi.
