SEGURANSA, (LIBERDADETL.com) — Kazu ida kona-ba alegasaun mal-apropriasaun osan estadu nian mosu fali iha Polísia Nasionál Timor-Leste (PNTL) nia laran. Ofisiál na’in-rua, ne’ebé identifika hanesan JBR, no FM, deskonfia uza sira nia autoridade hodi desvia fundu públiku ho ilísitu. Bazeia ba informasaun ne’ebé hetan hosi fonte internu ne’ebé kredível, asaun ne’e envolve manipulasaun administrativa no violasaun ba sistema finanseiru estadu nian.
Tuir dadus ne’ebé halibur, orsamentu ho montante USD 5,000 ne’ebé aloka ba atividade espesífiku iha tinan fiskál 2025 tuir loloos labele uza hafoin sistema finanseiru estadu nian taka iha fulan-Novembru. Tuir regulamentu administrasaun fiskál, fundu ne’ebé la uza to’o prazu ne’ebá, tenke entrega fali ba kofre estadu.
Maibé, deskonfia ofisiál PNTL na’in-rua ne’e uza sira-nia autoridade hodi asesu no uza osan ne’e la tuir provizaun ne’ebé estipula ona. Tuir relatóriu kria programa foun ne’ebé la lista iha planu serbisu ofisiál no prepara relatóriu finanseiru falsu hodi subar utilizasaun fundu sira-ne’e. Aleinde ne’e, iha indikasaun kona-ba resibu falsu hanesan parte ida hosi esforsu ida atu lejitima gastu ne’ebé la autorizadu.
Fonte interna ida iha PNTL nia laran, ne’ebé lakohi fó sai nia naran haktuir katak, asaun ne’e viola sistema finanseiru estadu nian ne’ebé estabelese ona.
Eskándalu PNTL: Ofisial Polísia uza kareta transporta feto iha tempu kalan, Henrique da Costa nonook
“Deskonfia osan 2025 ba kotuk nian. Provizoria sira na’in rua ne’e mak sai suspeitu. Deskonfia komandante seksaun sira iha PNTL sai hotu testamuña ba prosesu ida ne’e, tanba sira mós hetan benefísiu, maibé sira na’in rua mak tenke responsabiliza tanba sira mak asina dokumentus no utiliza orsamentu ne’e”, haktuir hosi fontes ida, ba LIBDERDADETL iha Farol Dili, kinta-feira, (260426).
Fontes ne’e esplika, fundu ruma ne’ebé la uza iha tempu ne’ebé sistema taka iha fulan-Novembru tenke fó fila, liuhosi mekanizmu administrativa. Iha kazu ne’e, ofisiál na’in-rua halo kontráriu, uza sala fundu hirak-ne’e.
Fonte ne’e mós konfirma tán, ofisiais PNTL ida hato’o ona keixa formál ba Ministériu Públiku hodi prosesa kazu ne’e tuir prosedimentu legál. Etapa ne’e foti hanesan forma responsabilidade morál ida no profisionál hodi asegura violasaun ruma ba fundu públiku hetan tratamentu ho transparénsia no responsabilizasaun.
PNTL—Rekruta barak, maibé problema seidauk rezolve: saida maka sala ho ita-nia polísia?
Aktus hosi ofisiál PNTL na’in-rua ne’e bele kategoriza hanesan abuzu autoridade no violasaun ba regulamentu jestaun finanseira estadu nian. Aleinde ne’e, falsifikasaun dokumentu no resibu konstitui violasaun sériu ida ba prinsípiu integridade no transparénsia iha instituisaun públika.
Kazu ne’e reflete dezafiu ne’ebé instituisaun aplikasaun lei hasoru nafatin hodi mantein kredibilidade no konfiansa públiku. Nu’udar instituisaun ne’ebé hetan mandatu atu tane aas lei, kualkr konduta aat iha PNTL laran iha poténsia atu estraga instituisaun nia reputasaun no estraga konfiansa públiku iha sistema justisa nasionál.
Hatan ba kazu ne’e, membru PNTL ida ne’ebé hato’o keixa husu atu Komandante Jerál PNTL halo kedas investigasaun interna ho rígor. Nia subliña importánsia transparénsia iha jestaun orsamentu públiku atu prevene mal uzu hanesan iha futuru.
“Instituisaun Polísia bele hatudu ezemplu di’ak iha implementasaun prinsípiu boa governasaun, iha-ne’ebé kada utilizasaun fundu públiku tenke kontabiliza administrativamente, legalmente, no moralmente”, haktuir fontes refere.
Mehi ida atraza iha odamatan PNTL
Kazu alegasaun uza sala fundu hosi ofisiál PNTL na’in-rua deskreve importánsia fiskalizasaun interna no implementasaun sistema responsabilizasaun rigor iha instituisaun públika. Prosesu legál ne’ebé la’o hela hein katak sei sai presedente ba tane aas integridade iha PNTL laran no instituisaun estadu sira seluk.
Ho notisias ne’e, fontes konfiavel ne’ebé hato’o kazu ne’e, lakohi atu fó sai nia identidade, no informasaun ne’e redasaun asesu tanba hakarak atu sobre sai mal jestaun no abuzu poder sira ne’ebé akontese, tanba iha instituisaun seguransa iha problema barak, maibé regras la autoriza atu ofisiais PNTL ida atu ko’alia.
To’o informasaun ne’e públiku, LIBERDADETL seidauk hetan konfirmasaun hosi autoridade kompetente.
