INTERNASIONÁL (LIBERDADETL.com) — Ministru Defeza Indonézia nian, Sjafrie Sjamsoeddin, admiti katak nia hakfodak bainhira hetan konvite hosi sekretáriu Funu Estadus Unidus nian, Pete Hegseth, ba Pentágonu iha fulan-Abril tinan 2026.
Sjafrie rekoñese katak nia tama ona iha lista bandu entrada Estadus Unidus nian iha dékada barak nia laran tanba nia envolvimentu nu’udar soldadu forsa espesiál ne’ebé hala’o knaar iha operasaun sira iha Timor Lorosa’e.
Iha enkontru ida ho Komisaun I hosi Parlamentu Nasionál iha Senayan, Jakarta, iha loron-tersa (19 Maiu 2026), Sjafrie esplika katak Pete Hegseth pesoalmente estende konvite ne’e.
Nia mós espresa ezitasaun atu mai iha EUA tanba nia sente katak nia sei iha hela bandu atu tama.
“Ha’u hakfodak. Depois ha’u hatete, ‘Obrigado’, Ministru, tanba konvida ha’u, maibé ha’u karik labele ba Estadus Unidus,” Sjafrie hatete.
Tuirmai nia esplika ba Hegseth katak antes ne’e nia hetan bandu husi governu EUA tanba nia servisu iha Timor Lorosa’e.
Nia rekoñese katak tenta ona atu rezolve kestaun ne’e bainhira akompaña gabinete Prezidente Indonézia ba dala 6, Susilo Bambang Yudhoyono, maibé nafatin la hetan lisensa atu tama iha Estadus Unidus Amérika.
“Entaun soldadu forsa espesiál sira hotu ne’ebé uluk servisu iha Timor Lorosa’e hetan bandu. No agora liu ona tinan 27 dezde ami hetan bandu. Uluk ha’u envolve iha gabinete Pak SBY nian, no derrepente sira bandu ha’u, no ha’u la hetan lisensa, hodi governu Estadus Unidus nia naran,” nia kontinua.
Maibé, Pete Hegseth informa ba Sjafrie katak laiha ona bandu ba soldadu forsa espesiál sira.
Nu’udar rezultadu, iha Abril 2026, Sjafrie ho susesu tama iha EUA no asina Parseria Kooperasaun Defeza Bo’ot (MDCP) entre Indonézia no EUA iha Pentágonu.
“Nia hatán, ‘Laiha tan bandu sira. Ami sei fó ba forsa espesiál sira hotu oportunidade hanesan ho ema hotu,” Sjafrie hatutan tan.
Fontes: Kompas.com
