NOTISIA LITERÁRIA, (LIBERDADETL.com) — Komunidade lokál hosi aldeia Poros, suku Mehara, postu-administrativu Tutuala, munisípiu Lautém, hakfodak ho omisídiu adolexente ida ne’ebé akontese iha madrugada, tuku-rua ho balun, dádeer oras lokál.
Tuir informasaun, vítima mate iha fatin akontesimentu hafoin hetan violénsia ne’ebé alegadamente halo hosi autór sira ne’ebé agora hetan ona kapturasaun hosi polísia.
Akontesimentu trájiku ne’e hamosu tristeza boot ba família vítima no komunidade sira ne’ebé hela iha área refere.
Polísia munisípiu Lautém halo atuasaun lalais hafoin simu relatóriu hosi komunidade sira. Iha momentu ne’e kedan, ofisiál sira konsege kaptura alegadu autór sira hodi prevene situasaun labele akontese sai aat liután.
Tuir informasaun ne’ebé Mídia LIBERDADETL asesu katak, autór ne’e oras ne’e daudaun iha hela detensaun no investigasaun la’o hela hodi deskobre motivu no kronolojia kompletu hosi akontesimentu ne’e.
“Atu passa informasaun ba Comandante katak, iha loron 9 de Maio 2026 kalan iha Festa Coremetan Ida nebe selebra husi Familia iha Aldeia poros, Suco Mehara, postu Adm Tutuala Munisipiu de Lautem. Iha Festa resulta akontesimentu Ida entre parte festa nain ho komunidade balun mai husi Asalaino nebe ba asiste mos Festa barlake Ida iha Aldeia Poros. Iha Festa nee iha mos oknum membru FDTL Ida naran: Gago dos santos, deviza Soldado husi Componente terestre”.
“Iha tuku 02.00 OTL madrugada Festa nee sai fali konfrontu entre parte rua nebe resulta ema Ida lakon Vida”, informasaun hosi fontes konfiável ida, ne’ebé LIBERDADE asesu.
Entre suspeitu sira ne’ebé kaptura, iha mós membru Forsa Defeza Timor-Leste (F-FDTL). Informasaun ne’e konfirma husi Polísia, ne’ebé hato’o katak, militar ne’e dadaun ne’e kaptura ona hosi Polisia Nasionál Timor-Leste (PNTL) munisípiu Lautém hodi halo investigasaun kle’an.
“Polisia kaptura ona suspeito sira inklui oknum pesoal Forca defeza Timor Leste nain Ida. Agora dadaun oknum forca nee PNTL asegura ona hodi submete ba Procesu investigasaun”.
Situasaun iha aldeia Poros kalma ona, maski komunidade sira hakfodak nafatin ho akontesimentu ne’e.
Polísia husu ba públiku atu mantein kalma no hadook-an hosi espalla informasaun ne’ebé la konfirmadu enkuantu investigasaun kontinua.
