NOTÍSIA LITERÁRIA, (LIBERDADETL.com) — Iha dinámika mudansa sosiál no dezenvolvimentu kulturál liu-liu iha Timor-Leste, mosu movimentu alfabetizasaun ida ne’ebé haree lee nu’udar ábitu ida, no instrumentu libertasaun nian. Movimentu ne’e koñesidu ho naran LETRAS. Bazeia ba konxiénsia katak alfabetizasaun iha kbiit atu forma pensamentu krítiku, LETRAS koloka nia-an nu’udar forsa ida ba diálogu intelektuál no partisipasaun públika iha esfera sosiál, kulturál, no produtór koñesimentu.
“Movimentu Leitura ba Transformasaun Sosiál (Movimentu LETRAS) hanesan movimentu literária ne’ebé hakarak promove leitura no dezenvolvimentu diskursu krítiku nian iha área sosiál, kulturál no produsaun koñesimentu nian iha Timor-Leste.”
Atu atinje objetivu hirak-ne’e, Movimentu LETRAS realiza atividade sira hanesan kampaña leitura (Okupa Jardín), Festivál Literária, klinika hakerek, diskusaun, formasaun, programa oras ida ho livru, publikasaun no loke biblioteka ba públiku. Ho nune’e, tinan ida ne’e LETRAS sei organiza eventu Festivál Literária hodi selebra loron internasionál literasia nian ne’ebé sei monu iha loron 8 fulan-Setembru 2025, sita iha pájina ofisial Movimentu Letras nian, tersa-feira (12082025).
Desde nia inisiativa, LETRAS inisia ona programa oioin ne’ebé hakat liu baliza tradisionál mundu literáriu nian. Kampaña “Okupa Jardin” transforma espasu nakloke ba sentru leitura nian; klínika hakerek nian fó mentoria ba jerasaun foun ida hosi hakerek-na’in; diskusaun públika kria espasu ba troka ideia; formasaun ba alfabetizasaun hametin kapasidade komunidade nian; no programa “Oras Ida ho Livru” haburas ligasaun emosionál entre leitór no hakerek na’in sira. Aleinde ne’e, publikasaun no estabelesimentu biblioteka nakloke simboliza movimentu nia kompromisu ba asesu ekuitativu ba koñesimentu.
“Festivál Literária 2025 ida-ne’e, realiza ba edisaun datoluk nian ho tema jerál “Lee ba Transformasaun Sosiál III”.
“Movimentu LETRAS konsidera Festivál Literária ida-ne’e nu’udar oportunidade di’ak no mós sai espasu estratéjiku ida hodi halibur joven, estudante, labarik, no komunidade literária (hanesan hakerek-na’in sira, lee-na’in sira, biblioteka sira), artista no komunidade tomak, hodi halo kampaña literária, no promove importánsia arte no literasia iha hodi kontribui ba libertasaun totál no kompleta Povu Maubere nian.”
Kulminasaun husi esforsu ne’e mak Festivál Literatura, ne’ebé tinan ne’e tama iha edisaun datoluk ho tema “Leitura ba Transformasaun Sosiál III”. Koinside ho Loron Internasionál Literasia nian iha loron 8 fulan-Setembru tinan 2025, festivál ne’e dezeña selebrasaun ida no hanesan plataforma estratéjiku ida ne’ebé halibur estudante, labarik, hakerek-na’in, artista, bibliotekáriu, no públiku en-jerál. Iha espasu ida-ne’e, alfabetizasaun interseta diretamente ho arte, polítika, ekonomia, no luta sosiál sira.
Festivál ne’e hatudu programa temátiku ne’ebé maka’as no oioin. Diskusaun painél sira esplora asuntu hanesan ekonomia polítika, feminizmu, arte, no literatura rezisténsia nian. Sesaun fahe kriativu revela prosesu sira iha hakerek, kriasaun vizuál, no dezenvolvimentu líriku. Workshop, ekipa partisipante ho abilidade prátika iha hakerek, no halo kolajen. Espozisaun livru ida hatudu produsaun literária lokál no internasionál lubuk ida, enkuantu palku arte nian aprezenta pintura moris, arte labarik nian, teatru, leitura poezia, no múzika moris.
Nune’e iha festivál ida-ne’e sei integra programa no atividade interesante sira mak hanesan:
- Diskusaun Temátika (kona-ba Ekonómia no Polítika, Feminizmu, Arte no Literatura Rezisténsia);
- Diskusaun Livru;
- Fahe esperiénsia prosesu kreativa (kona-ba hakerek, kriasaun arte vizuál, no letra múzika);
- Workshop (kona-ba hakerek, zine no kolajen);
- Feira- Livru;
- Arte no Literatura (Live painting, Arte ba Labarik, Story Telling, Esposizaun Obra Artístika, Espozisaun Zine, Teatru, Lee Poezia no Live Music).
Durante loron tolu, hahú hosi loron 6 to’o loron 8 fulan-Setembru tinan 2025, iha Fundasaun Oriente, espasu festivál nian sei sai hanesan laboratóriu nakloke ida ba troka ideia, kolaborasaun interdisiplinár, no selebrasaun ida ba espresaun oioin. Partisipasaun husi indivídu ida-idak sei enrikese programa ne’e, no sei hametin mós rede komunidade literária no arte nian ne’ebé buras daudaun iha Timor-Leste.
Movimentu LETRAS fiar katak lee maka hahalok polítiku ida ne’ebé maka bele transforma konxiénsia koletiva. Liuhosi festival ida-ne’e, alfabetizasaun hanesan atividade individuál, no estratéjia kulturál ida atu harii sosiedade livre ida—tantu intelektuál no sosiál.
Ho haraik-an, LETRAS konvida nivel hotu-hotu sosiedade nian atu atende, interasaun, no partisipa iha momentum ida-ne’e. Tanba, iha pájina ida-idak nia ne’ebé ita loke, iha potensiál atu transforma oinsá ita komprende mundu no hakerek iha futuru.
“Nune’e, ho onra bo’ot tebes M. LETRAS konvida ita-boot sira atu partisipa Festivál Literária 2025, ne’ebé sei realiza iha loron 06–08 Setembru 2025 iha Fundação Oriente. Husi ita-bo’ot sira nia partisipasaun iha programa no atividade Festivál Literária 2025, ami fiar katak sei fó valór-aas ba atividade ida-ne’e no partisipante sira mós sei senti divertidu, apriende, fahe no foti lisaun husi atividade sira iha festivál ida-ne’e. Tanba ne’e, interessante tebe-tebes bainhira ita-bo’ot sira disponível atu partisipa eventu refere, tanba LETRAS haree katak ita-bo’ot sira-nia partisipasaun ne’e signifikante tebe-tebes iha festival ida-ne’e.”
“Ikus liu Movimentu LETRAS la haluha hato’o agradese-uain ba ita-bo’ot sira nia atensaun no espera bele konta ita-bo’ot sira-nia partisipasaun iha Festivál Literária 2025 ida-ne’e.”
Ita lee, ita hatene, ita muda!
