NASIONÁL, (LIBERDADETL.com) — Iha aniversáriu Veteranu Timor-Leste nian ba dala 9, liuhosi reflesaun, iha Salaun 3 de Marsu Maubai, Jenerál reformadu Lere Anan Timur, hasai apelu ba Ministra Edukasaun Dulce de Jesus Soares, atu hahú hakerek ona istória luta independénsia nian ho sistemátiku no akadémiku.
Bainhira dirije ba veteranu no bainaka konvidadu sira, Lere subliña, independénsia nu’udar rezultadu hosi sakrifísiu naruk ne’ebé ezije korajen, lealdade, no firmeza.
Nia avalia, legadu hosi luta ne’e seidauk integra tomak iha sistema edukasaun nasionál ho maneira estruturadu no sientífiku.
Nia argumenta, estadu iha responsabilidade morál atu garante jerasaun foun sira komprende abut istóriku hosi nia nasaun rasik.
“Husu ba Ministra Edukasaun atu hahú hakerek ona istóriaa rezisténsia”, Lere haktui iha reflesaun ne’e.
La ho dokumentasaun forte no kurríkulu klaru, memória koletiva luta nian iha risku atu redús ba istória orál ne’ebé fragmentadu.
Istória tenke hakerek bazeia ba metodolojia válidu, hetan apoiu hosi arkivu, relatu diretu hosi lutadór, no estudu akadémiku.
Tempu la hein ema ida. Sasin moris barak ba luta ne’e sei sai ferik-katuas, maibé sira nia esperiénsia seidauk dokumenta ofisialmente. Se estadu atua tarde liu, parte vital ida hosi narrativa nasionál bele lakon hamutuk ho jerasaun sira ne’ebé kaer ida-ne’e.
Istória luta, tenke sai baze ba aprendizajen nune’e labarik timoroan sira sai boot ho sentidu identidade, kompriende valór ukun rasik-an nian, no sente responsabilidade atu salvaguarda ida-ne’e.
