NASIONÁL, (LIBERDADETL.com) — relasiona ho kazu ida foin lalais ne’ebé sai tiha viral iha sosial mídia no iha públiku kona-ba funsionáriu serbisu imigrasaun Olivio Pinto, koñesidu nu’udar Oliveira, iha fronteira Batugade, Timor-Leste nian mosu hafoin gravasaun vídeo ida hosi feto indonéziu ida ne’ebé afirma katak, hetan lisensa atu atravesa fronteira maski nia pasaporte kaduka ona.
Insidente ne’e akontese iha postu fronteira Imigrasaun Batugade, iha ne’ebé pesoál imigrasaun nian alegadamente fó ba nia lisensa sai hosi territóriu Timor Leste nian.
Iha vídeo, ne’ebé maka sirkula barak iha mídia sosiál, feto ne’e afirma katak nia hetan asisténsia direta hosi pesoál imigrasaun nian liuhosi númeru WhatsApp ida hodi fasilita nia pasajen, maski nia dokumentu ofisiál sira viajen nian la válidu.
Insidente ne’e sai viral kedas no hamosu kondenasaun maka’as hosi públiku timoroan, ne’ebé eziji transparénsia no asaun desizivu hosi autoridade imigrasaun sira.
Públiku fiar katak neglijénsia hanesan ne’e viola regulamentu, estraga nasaun nia reputasaun no kredibilidade iha nivel internasionál, partikularmente iha fronteira, ne’ebé tuir loloos sai hanesan odamatan ida ba seguransa no soberania nasionál.
Halo komentariu ba akontesimentu ne’e, Armindo Soares Belo nu’udar veteranu proeminente ida husi munisípiu Baucau hasai deklarasaun ho liafuan maka’as no alerta, liuhosi Mídia LIBERDADETL, iha Baucau Villa, sesta-feira (27022026).
Nia ezije atu Diretóra Ezekutiva Serbisu Imigrasaun Timor-Leste, Superintendente Xefi Natercia Martins, foti kedas medida dixiplinár ne’ebé klaru no firme hasoru pesoál hotu ne’ebé envolve iha kazu ne’e.
Armindo Soares Belo alerta katak, bainhira la implementa polítika ne’ebé firme, iha posibilidade katak funsionáriu imigrasaun nian sei sai hanesan instrumentu ba kriminozu no traidór ba nasaun ne’ebé prontu atu “fa’an” soberania Timor-Leste nian ba benefísiu pesoál.
Deklarasaun veteranu ne’e reflete preokupasaun kle’an kona-ba potensiál korrupsaun no traisaun ne’ebé bele ameasa nasaun nia estabilidade no onra.
Insidente ida-ne’e hatudu importánsia hosi fiskalizasaun rigorozu no responsabilizasaun aas iha instituisaun nia laran ne’ebé iha kna’ar atu mantein seguransa hosi fronteira nasaun nian.
Fallansu atu hala’o nia kna’ar ho profisionál bele hamosu konsekuénsia sériu ba seguransa nasionál, estraga no hafoer imajen no reputasaun Timor-Leste nian tomak.
To’o publikasaun notísia ne’e, seidauk iha deklarasaun ofisiál husi Diretora Ezekutiva Serbisu Imigrasaun Timor-Leste kona-ba kazu ne’e.
