LIBERDADETL.COM — Konferénsia imprensa ida iha Universidade Dili (UNDIL) ne’ebé diskute kona-ba kazu alegasaun asédiu seksuál hosi dosente ida hasoru estudante feto ida sai tensaun tebes. Jornalista sira hosi mídia online SapNews marka prezensa hamutuk ho jornalista sira seluk hodi halo kobertura ba deklarasaun ofisiál kona-ba kazu ne’e, ho objetivu atu hato’o faktu ba públiku no fó espasu ba vítima hodi buka justisa.
Maibé, prezensa mídia halo, grupu estudante UNDIL hirus, relasiona ho prezensa mídia nian atu hafo’er universidade nia naran. Sira hakbesik ho emosionál ba jornalista SapNews, hodi protesta kobertura ka halo impedimentu ba serbisu jurnalizmu nian, ne’ebé garantia iha Konstituisaun RDTL no lei komunikasaun sosiál.
Situasaun sai aat liután bainhira estudante balu hahú fó ameasa verbál no koko atu prevene jornalista sira atu sai hosi fatin ne’e. Jornalista SapNews nian mantein kalma no profisionalizmu, maski hasoru presaun no risku intimidasaun direta.
Akontesimentu ne’e hamosu preokupasaun ne’ebé kle’an iha komunidade imprensa nia laran iha Timor-Leste. Asosiasaun Jornalista Timor-Leste (AJTL) no Timor Leste Press Union (TLPU) hato’o sira nia tristeza no kondenasaun maka’as ba intimidasaun jornalista hosi SapNews no mídia sira seluk. Sira fiar katak asaun ne’e hanesan forma obstrusaun ba servisu jornalístiku, no atake ida ba prinsípiu liberdade imprensa ne’ebé Konstituisaun Repúblika Demokrátika Timor-Leste garante.
AJTL no TLPU subliña, universidade sira tenke sai fatin edukasaun, sensu komun, no korajen atu luta ba lia-loos, la’ós arena ba supresaun imprensa ka nonook. Husu ba reitoria atu kolabora ho ajénsia aplikasaun lei hodi proteje jornalista, garante seguransa ba sira-nia reportajen, no investiga didi’ak kazu alegasaun asédiu seksuál ne’ebé sai nu’udar abut ba problema ne’e.
Tanba bainhira imprensa nia lian sai fraku, vítima sira nia lian mós sai nonook. No bainhira lia-loos hetan negasaun ho ameasa, neineik-neineik demokrasia lakon nia signifikadu.
Lei komunikasaun sosiál ho númeru 5/2014, 19 Novembru iha artigu 41 esplika konaba atentadu ba liberdade informasaun.
Alínea 1 hatete sei hetan pena-prizaun to’o tinan-rua ka multa ba ida-ne’ebé maka:
- a) impede ka perturba kompozisaun, impresaun, distribuisaun no sirkulasaun livre hodi halo publikasaun;
- b) tahan publikasaun sasá de’it;
- c) tahan ka hahaat materiál sasá de’it ne’ebé presiza hodi hala’o atividade jornalístika.
- d) impede asesu livre jornalista nian iha fatin públiku ka ekipa órgaun imprensa nian;
- e) Halo aktu seluk sasá de’it ne’ebé perturba, impede hamosu ka hamenus kapasidade hodi hala’o atividade jornalístika nian haktuir lei ida-ne’e.
Alínea 2). Funsionáriu públiku ka ajente Estadu, ne’ebé komete atentadu ba liberdade imprensa sei hetan kastigu ho pena-prizaun to’o tinan-tolu ka multa.
Alínea 3). Tentativa nu’udar punivel.
Alínea 4). Responsabilidade kriminál infratór nian, la prejudika direitu hodi fó indemnizasaun tuir saida maka hatuur iha rejime jerál responsabilidade sivíl nian.
