LITERATURA POLITIKA, (LIBERDADETL.com) — Kapturasaun hosi Prezidente Venezuela Nicolás Maduro hosi militár norte-amerikanu halo atensaun globál ba Delcy Rodríguez, visi-prezidente ne’ebé Maduro hili hanesan Vise-Prezidente.
Iha loron-sábadu loraik (03 Janeiru), Supremu Tribunál Venezuela nian ordena ona Delcy Rodríguez hodi asumi kargu xefe Estadu tanba “auzénsia” Maduro nian.
Iha deklarasaun, Tania D’Amelio, Xefe Justisa hosi Tribunál Konstitusionál Venezuela, ne’ebé halo parte iha Supremu Tribunál, defende katak Konstituisaun fó mandatu ba vise-prezidente hodi prienxe auzénsia temporáriu ka absoluta hosi Prezidente, hanesan agora daudaun nasaun ne’e enfrenta.
Juis konsidera operasaun militár norte-amerikanu ne’ebé lori ba detensaun Maduro ho nia feen hanesan “sekuestru” no “agresaun estranjeiru”.
Nune’e, Tribunál Konstitusionál autoriza Rodríguez hodi prezide “soberania” Venezuela nian no “salvaguarda orden konstitusionál”.
Oras balun antes desizaun, Rodríguez kondena asaun norte-amerikanu nian, hodi konsidera kaer Maduro ho nia feen hanesan “sekuestru ilegál no ilejítimu”.
“Saida maka halo ba Venezuela hanesan hahalok bárbaru ida”, Rodríguez hatete iha diskursu ne’ebé fó sai hosi rádiu no televizaun nasionál.
“Halo serku ba nia, halo blokeiu ba nia, hanesan hahalok bárbaru ida ne’ebé viola mekanizmu hotu hosi sistema internasionál direitus umanus no konstitui krimi ida hasoru umanidade. Labele halo blokeiu ida tenta harahun vontade hosi povu ida-ne’e”, Rodríguez deklara.
Iha deklarasaun ne’e, Rodríguez hatán ba komentáriu sira ne’ebé halo hosi Prezidente norte-amerikanu, Donald Trump, iha konferénsia imprensa ida hafoin detensaun Maduro nian.
Durante eventu, Trump konfirma katak Rodríguez iha ona kontaktu ho sekretáriu Estadu norte-amerikanu, Marco Rubio.
Rodríguez, tuir Trump, “esensialmente iha vontade atu halo saida maka ami hanoin katak nesesáriu hodi halo Venezuela sai boot fali”.
“Nia laiha opsaun seluk”, Trump hatete.
Maibé, lakleur hafoin konferénsia imprensa Trump nian, Rodríguez repete nia pozisaun katak Maduro maka “prezidente úniku Venezuela nian”.
Nia hatutan tan katak Venezuela sei “nunka sai hanesan kolónia ema ida nian”.
Deklarasaun sira ne’ebé foin lalais ne’e hanesan ho Delcy Rodríguez, ne’ebé uluk Maduro deskreve hanesan “feto-tigre” ida tanba nia kontinua defende sosializmu bolivarianu.
Tuir loloos, sira ne’ebé koñese nia dala barak deskreve nia hanesan “matenek tebes” maibé “dogmátiku”.
Sé loos maka Delcy Rodríguez?
Istória hosi família nian
Delcy Rodríguez nia istória família nian nakonu ho polítika.
Advogadu ho tinan 56 ne’e maka Jorge Antonio Rodríguez nia oan-feto, guerilleiru ida iha dékada 1960. Nia mate iha komarka polísia nian iha tinan 1976 hafoin hetan kaer tanba nia envolvimentu iha sekuestru William Niehous, funsionáriu ida hosi empreza norte-amerikanu ida ne’ebé hala’o operasaun iha Venezuela.
Jorge Antonio Rodríguez nia mate halo públiku hakfodak, tanba nia sofre ona tortura no tratamentu aat bainhira iha hela polísia nia komarka.
Nia aman nia mate dudu Delcy atu estuda direitu iha Universidade Sentrál Venezuela nian no tuirmai estuda Direitu Traballadór no Sindikatu nian iha Fransa.
“Ha’u desidi buka justisa iha ha’u nia aman nia kazu no tama iha fakuldade direitu nian. Iha ne’ebá ha’u aplika kedas hodi sai hanesan asistente investigasaun nian iha Institutu Estudu Kriminal nian”, nia hatete.
Akontesimentu hosi nia aman nia mate mós influensia Delcy Rodríguez nia perspetiva kona-ba polítika.
“Revolusaun Bolivariana, to’o hosi komandante Hugo Chávez, hanesan ami nia vingansa pesoál”, nia hatete iha entrevista ida iha tinan 2018, hodi insisti katak nia la motiva hosi ódiu.
Hosi Chávez ba Maduro
Hanesan nia maun, Jorge Rodríguez, prezidente atuál hosi Asembleia Nasionál, Delcy Rodríguez hahú nia kareira polítika durante administrasaun Hugo Chávez. Iha tempu ne’e maka nia tama ba dala uluk iha gabinete, hodi serbisu nu’udar Sekretária Estadu durante fulan balun.
Maibé, iha Maduro nia okos, nia kaer ona pozisaun governu nian barak.
Delcy Rodríguez hala’o knaar nu’udar Ministra Komunikasaun no Informasaun, Ministra Ekonomia, no Ministra Negósiu Estranjeiru.
Foin lalais ne’e, nia serbisu nu’udar Vise-Prezidente no Ministra ba Idrokarbonetu sira.
Nia mós hanesan prezidente ba Asembleia Konstituinte Nasionál, ne’ebé maka eleitu ho polémika iha 2017. Pozisaun ida-ne’e krusiál tanba—pelumenus iha teoria legál—ida-ne’e iha podér boot liu duké prezidente.
Hanesan nia maun, Jorge, Delcy sai hanesan figura xave ida ne’ebé uza hosi governu Maduro hanesan operadór polítiku ida iha Venezuela nia laran no mós iha liur.
“Delcy serbisu hamutuk ho nia maun. Nia menus intelektuál uitoan, operasionál liu. Sira hanesan ema sira ne’ebé edukadu tebes ne’ebé prenxe ona vazu ne’ebé rezulta hosi neglijénsia totál hosi ema sira ne’ebé iha kapasidade iha Governu”, sientista polítiku Nícmer Evans hatete ba BBC Mundo iha entrevista ida iha tinan 2024.
Diplomata venezuelanu
Delcy Rodríguez uluk serbisu nu’udar Ministra Negósiu Estranjeiru entre 2014 no 2017. Maibé, maski ho pozisaun ne’e, nia sai hanesan xave ida hosi governu iha Venezuela nia laran no mós rai-liur.
Tuir loloos, iha tinan hirak ikus ne’e, tanba Maduro hamenus ona viajen estranjeiru, nia sai hanesan figura xave ida iha relasaun ho aliadu sira hanesan Turkia, Xina, no Iraun.
Iha palku internasionál, Rodríguez envolve ona iha insidente oioin, hanesan iha tinan 2016, bainhira ministra Negósiu Estranjeiru, tenta tama iha enkontru Mercosur iha Buenos Aires hafoin Venezuela hetan espulsaun hosi bloku.
Tinan haat liutiha, akontese insidente ida ne’ebé imprensa españól hanaran “Delcygate”.
Insidente ne’e akontese bainhira Rodríguez tun iha aviaun privadu ida iha Aeroportu Barajas Madrid nian iha madrugada loron 20 Janeiru 2020. Iha ne’ebá, nia hasoru malu durante oras balun ho Ministru Transporte España nian iha tempu ne’ebá, José Luis Ábalos, maski sujeita nafatin ba bandu entrada hosi Áustria ba área Schengen.
Rodríguez hanesan ofisiál venezuelanu ida hosi maizumenus na’in 50 ne’ebé hetan sansaun hosi Uniaun Europeia tanba violasaun direitus umanus no deklinu hosi demokrasia iha Venezuela.
Delcy Rodríguez, nia maun, Jorge Rodríguez, Ministru Defeza Vladimir Padrino, no Primeira-Dama Cilia Flores hetan sansaun hanesan hosi EUA iha 2018.
To’o ohin loron, Delcy Rodríguez kritika ona sansaun no kestiona abertamente polítika norte-amerikanu nian.
Ángel Bermúdez
BBC News Mundo
