INFO ATUAL, MEUDIA, (LIBERDADETL.COM) — Povu Timor Leste kontinua tau-matan ba planu hosi deputadu sira Parlamentu Nasionál Timor-Leste, atu sosa karreta ofisiál ne’ebé uza osan estadu nian.
Ativista, estudante, no grupu foin-sa’e sira afirma ona katak, sira sei hala’o manifestasaun ho eskala boot se planu ne’e la’o ba oin.
Públiku haree polítika ida-ne’e hanesan laiha urjénsia, tanba povu nia situasaun ekonómika sei dook hosi prósperu, enkuantu nesesidade báziku sira hanesan edukasaun, saúde, no empregu sei urjente tebes.
“Parlamentu la presiza atu gasta osan boot ba sosa kareta. Ema nian osan, laós osan Parlamentu,” afirma LJS, ativista sosiál ida, iha entrevista ho Mídia LIBERDADETL iha Domingu, 31 Agostu 2025, iha área Farol Dili.
Tuir LJS, asaun masa ne’e sei imita dinámika manifestasaun foin lalais ne’e iha Indonézia, iha ne’ebé estudante no foin-sa’e rihun resin tun ba estrada hodi rejeita polítika sira ne’ebé konsidera hanesan anti-povu.
“Ami konsolida ona, estudante no joven sira prontu ona. Ami hein de’it postura ofisiál ida hosi Parlamentu. Karik sira kontinua obriga sosa karreta, povu sei protesta definitivamente”, nia hatutan tan.
Situasaun ne’e bolu ona atensaun públiku tanba haree hanesan reflete lakuna entre nesesidade elite polítika no realidade moris loroloron nian.
Diskusaun kona-ba asuntu ida-ne’e maka’as liután iha kampus oioin no iha komunidade liu-liu estudante akadémika, joven rezisténsia, ne’ebé hatudu sinál kona-ba rezisténsia sivíl ne’ebé sai maduru.
