MUNISIPAL, (LIBERDADETL.com) — Primeiru-Ministru (PM), Kay Rala Xanana Gusmão hala’o vizita bá Sentru Fini Ikan Genetically Improved Farmed Tilapia (GIFT), ne’ebé lokaliza iha postu administrativu Gleno, munisípiu Ermera, kuarta (25/02/2026).
Xefe Governu hala’o vizita ne’e hafoin “Haree besik servisu munisipál Ermera hosi rezultadu avaliasaun kondisaun minima” molok avansa bá eleisaun Governu lokál ne’ebé sei akontese iha 2027.
Diretór Nasionál Aqikultura, Domingos Gonçalves esplika, fatin ne’e haki’ak ikan no fornese bá populasaun ne’ebé hakarak hakiak ikan. Kritériu maka, aprezenta proposta no bele hetan ona ikan oan. Ikan sira ne’ebé prodús mós fornese bá programa merenda eskolár iha munisípiu Ermera.
Primeiru-Ministru husu bá pessoál sira ne’ebé haki’ak ikan ne’e atu molok fornese ikan oan bá populasaun, tenke esplika kle’an oinsá haki’ak ikan tanba dala barak populasaun haki’ak ikan maibé ikan barak mate tanba la hatene oinsá atu fó hahan ne’ebé di’ak.
Pessoál sira ne’ebé haki’ak ikan ne’e hetan kapasitasaun hosi espesialista mai hosi Ajénsia Internasionál WorldFish.
Sentru Fini Ikan ne’e estabelese iha 31 Marsu 2016 no inaugura hosi Ministru Koordenadór Asuntu Ekonómiku no Ministru Agrikultura no Peska, Estanislau Aleixo da Silva no Embaixadór Nova Zelándia iha Timor-Leste, Jonathan Schwass.
Hetan mós apoiu hosi parseiru dezenvolvimentu Aquakultura iha TL, Nova Zelándia, NIWA Taihoro Nukurangi, WorldFish no TISBE.
Akompaña Primeiru-Ministru iha vizita ne’e, Ministru Administrasaun Estatál (MAE), Tomás do Rosário Cabral, Ministra Saúde (MS), Élia dos Reis Amaral, Vise Ministru Infraestrutura, Júlio do Carmo, Sekretária Estadu Igualdade (SEI), Elvina de Sousa Carvalho, Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, Sekretáriu Estadu Dezenvolvimentu Lokál, Mateus dos Santos tallo, no Prezidente Autoridade Munisípiu Ermera, José Martinho Soares.
Fontes: Média-GPM
