NOTA IGREJA, (LIBERDADETL.com) — Ho espíritu atu hafoun Igreja Katólika nia bolun ba evanjelizasaun, Dioseze Baucau, liuhusi Missio Diocesana Baucau, hala’o sesaun formasaun intensivu iha Salaun Parókia Katedrál Baucau.
Atividade ne’e lidera husi Diretór Misaun Dioseze Baucau, Padre Salvador Gaspar, no envolve ministru pastorál oioin husi parókia no estasaun sira. Foku prinsipál husi formasaun ne’e mak komprensaun kle’an kona-ba espíritu Obra Misionária Pontifísia (OPO), fuan ba Igreja nia ministériu mundiál.
Nu’udar oradór prinsipál, Diretór Missio Timor-Leste nian, Padre Bento Barros—konvida partisipante sira atu esplora abut istóriku Movimentu Misionáriu (POM), ne’ebé harii iha tinan 1822. Movimentu misionáriu ne’e inisia husi feto vizionária ida, hosi Beata Pauline Maria Jaricot, Franseza. Iha kontestu tempu turbulentu no mudansa sosiál sira iha Europa hafoin Revolusaun Franseza, Pauline harii rede orasaun no solidariedade nian ho objetivu atu apoia serbisu misionáriu liuhosi formasaun fiar nian, apoiu espirituál, no kontribuisaun materiál sira hosi ema baibain sira.
Padre Bento esplika katak Movimentu Misionáriu la’ós de’it programa rutina Igreja nian, maibé movimentu espirituál ida ne’ebé bolu sarani ida-idak atu partisipa iha misaun evanjelizasaun nian, liuliu iha área sira ne’ebé seidauk kona ka foin dezenvolve. Iha modelu pastorál POM nian, pároku sira mak forsa motriz primária, motiva komunidade lokál sira atu rekoñese no hola papél ativu iha misaun universál Igreja nian. Sira-nia papél la limita de’it ba serbisu sakramentál, maibé mós serve nu’udar fasilitadór espirituál, hodi hamoris fali espíritu apostóliku iha povu nia moris.
“Pároco sira mak sai primeiro animador ba missão”.
“Animador laos deit canta ka haksoit hodi anima sarani sira maibé liu-liu atu fomenta ka hamoris espírito missionário iha sarani nia leet atu to’o iha objetivo final missão nian, ne’e mak evangelização”.
Treinamentu ne’e mós fornese espasu kontemplativu ida ba partisipante sira atu haree filafali sira nia prátika pastorál sira iha realidade sosiál sira ne’ebé muda beibeik. Pároku, vigáriu, no animadór sira rekoñese katak sesaun ne’e loke komprensaun foun ida kona-ba esénsia serbisu misionáriu nian.
Sira rekoñese katak misaun la’ós knaar ema ida de’it ka amlulik sira nian de’it, maibé bolun ida Kreda nian tomak—hahú husi komunidade ki’ik iha nivel parókia nian.
Padre Salvador, iha nia diskursu enseramentu, hato’o ninia apresiasaun kle’an ba partisipantes hotu no ekipa formador. Nia subliña katak sustentabilidade serbisu misionáriu nian iha Timor-Leste depende maka’as ba envolvimentu ativu parókia sira-nian nu’udar unidade bázika ba Kreda ne’ebé moris no buras daudaun. Agradese mós ba Padre Bento ba ninia vontade atu fahe ninia eransa espirituál no koñesimentu, ne’ebé folin laek ba formasaun povu iha Dioseze Baucau.
Mīdia Diocese Baucau
