INTERNASIONAL, (LIBERDADETL.com) — Luiz Bau (72), ofisiál Ezérsitu Indonézia reformadu ida, hetan mate iha mota Malibaka, munisípiu Belu, Provínsia Timor Osidental. Vítima ne’e hetan ho isin-tanan husi abitante Derok Hamlet, Aldeia Maumutin, Suku Raihat, munisípiu Belu, iha mota Malibaka, nu’udar zona livre entre fronteira Indonézia ho Timor Leste.
Baze ba informasaun ne’ebé fó sai iha sítiu online Liputan6.com hosi Indonézia, haktuir iha loron 18 fulan-Janeiru tinan 2026 haktuir katak, Xefe Unidade Investigasaun Kriminál Polísia Belu, Primeiru Inspetór Rio Rinaldy Panggabean, hateten, vítima hetan iha loron Sábadu, 17 fulan-Janeiru 2026, maizumenus tuku 9:00 dadeer Oras Indonézia husi Joni Mali (48) no Jefri Bere (35).
Iha momentu ne’ebá, abitante na’in rua hosi Aldeia Makir, Suku Lamaknen, munisípiu Belu, halibur hela fatuk iha mota Malibaka.
Prabowo nia deklarasaun kazu fronteira terrestre RI-RDTL? “nonok ba asuntu fronteira”
“Bainhira hetan, mate-isin ne’e toba hela ho kotuk, isin-tanan,” nia hatete.
Deskobrimentu ne’e hafoin hato’o ba Postu Seguransa Builalu (Pospam) no depois ba Polísia Belu hodi halo investigasaun ba fatin krime nian.
Sasan vítima nian lubuk ida ne’ebé hetan iha fatin akontesimentu hetan seguransa husi polísia.
Vítima nia isin-mate evakua ba Ospitál Atambua, munisípiu Belu, hodi halo post-mortem esternu.
Polisia Belu mós koordena ho Konsuladu Timor Leste kona-ba vitima nia sidadania.
“Vítima iha kartaun ID Indonézia nu’udar sidadaun Indonézia, no kartaun Billete Identidade (BI) Timor Leste nu’udar sidadaun Timor Leste”, tenik nia.
Sidadaun Indonézia hetan tiru iha fronteira RAEOA-TL no NTT-Indonézia
Ekipa médiku nia pós-mortem esternu la hatudu sinál violénsia iha vítima nia isin. Dekomposisaun no bubu iha isin-lolon indika katak vítima mate ona liu oras 24 nia laran.
Família vítima iha Indonézia simu mate ne’e tanba moras no rekuza atu halo autópsia.
“Ami sei halo hela konsultasaun ho Konsuladu Timor Leste kona–ba vitima nia mate isin,” nia hakotu.
