NOTÍSIA LITERÁRIA, (LIBERDADETL.com) — Daniel Jackson, ho tinan 20, halo istória hodi harii nasaun ida iha área disputa entre Kroásia no Sérvia.
Mikro-estadu ne’ebé nia hanaran “Repúblika Independente Verdis nian” agora iha gabinete ida, bandeira ida, moeda ida, sidadaun liu 400, no nia rasik nu’udar prezidente.
“Verdis maka ha’u nia ideia dezde ha’u iha tinan 14,” Jackson hatete.
“Ida-ne’e hahú hanesan esperimentu ki’ik ida ho belun balun. Ami hotu mehi atu kria buat ruma ne’ebé maka furak.”
Jackson deklara Verdis nia independénsia iha loron 30 fulan-Maiu tinan 2019, iha área floresta ida ho rai-henek menus hosi ektare 125 iha mota Danube nia ninin, teritóriu ne’ebé laiha nasaun ida maka reklama tanba disputa fronteira nian.
Iha mapa sira, área ne’e koñesidu hanesan “bolsu tolu.”
Ida-ne’e iha bandeira, lian ofisiál, no mós pasaporte
Maski nia medida ki’ik, nasaun ida-ne’e iha bandeira, gabinete governu nian, konstituisaun, no mós euro hanesan moeda.
Lian ofisiál sira maka Inglés, Kroásia, no Sérviu.
“Ami hahú halo Verdis sai realidade bainhira ha’u iha tinan 18, kria lei sira no bandeira ida,” nia hatete.
“Agora ita harii ona governu ida no iha gabinete ida ne’ebé di’ak tebes,” nia hatutan.
Jackson, ne’ebé serbisu hanesan dezeñadór dijitál iha Roblox, afirma katak Verdis agora iha rezidente legál liu 400 hosi aplikante 15,000.
Rezidente ida-idak simu pasaporte, maski Jackson fó avizu atu labele uza ida-ne’e ba viajen internasionál. “Ida-ne’e nasaun ki’ik ida, tanba ne’e ita tenke kuidadu kona-ba sé maka ita simu,” nia hatete.
“Ami buka abilidade sira ne’ebé maka iha ezijénsia, hanesan esperiénsia médiku ka polísia nian,” Jackson kontinua.
Deportadu husi Kroásia
Jackson nia proklamasaun kona-ba Estadu Verdis hasoru rezisténsia maka’as hosi governu Kroásia.
Iha Outubru 2023, polísia Kroásia kaer nia no nia seguidor sira bainhira tenta atu hela iha Verdis.
Tuir mai sira hetan deportasaun, no Jackson hetan bandu ba vida tomak atu labele tama iha Kroásia.
“Sira deporta ami lahó razaun aparente,” Jackson hatete. “Sira dehan ami ameasa ba seguransa nasionál,” nia hateten.
Agora, Jackson akuza autoridade kroata sira instala vijilánsia iha mota ninin hodi trava asesu hosi Sérvia.
“Ami iha problema barak ho autoridade kroata sira, maibé ami hakarak relasaun di’ak iha futuru,” nia hatete.
“Sira la amigavel no iha tendénsia atu sai agresivu,” nia afirma.
Ba agora, Jackson dirije hela governu Verdis nian “iha ezíliu”, maibé nafatin halo viajen beibeik ba Belgrade, Sérvia, ne’ebé nia hatete katak nakloke liu.
Ha’u lakohi podér
Maski nia bolu nia-an nu’udar prezidente, Jackson rekoñese katak nia la iha intensaun atu hela iha podér ba nafatin. Nia hato’o deklarasaun ne’e bainhira halo planu atu halo eleisaun.
“Ha’u hakarak de’it sai sidadaun baibain. Esperiénsia ida-ne’e loke matan, no ha’u orgullu ho realizasaun ida-ne’e,” nia hatete.
Jackson mós optimista nafatin katak Verdis sei hetan rekoñesimentu loron ida nu’udar nasaun soberanu ida.
“Ida-ne’e kestaun ida kona-ba bainhira, la’ós se, ita fila fali ba rai ne’ebá,” nia hatete.
“Kroásia la reklama rai ne’ebá, nune’e ami iha direitu,” Jackson konklui.
Fontes: ZAGREB, KOMPAS.com
