MUNISIPAL, (LIBERDADETL.com) — Asidente tráfiku ida akontese iha área Wai’isi Aldeia fi Osua, Suku Tirilolo, Rejénsia Baucau, hodi rezulta ema mate, iha tersa-feira (16122025).
Akontesimentu ne’e rezulta ema na’in tolu mate no na’in hitu seluk hetan kanek todan, inklui vítima ida ho ain parte loos tohar.
Insidente ne’e akontese iha tersa-feira ne’e bainhira kareta baskulante ho númeru xapa matríkula A 65.910 TL, viajen hosi Nahareka postu Ossu, munisipiu Viqueque, mai Dili, asidente bainhira liu hosi area Osua, Tirilolo, Baucau.
Veíkulu ne’e tula pasajeiru lubuk ida antes lakon kontrolu.
Pesoál médiku no ambulánsia ida to’o kedas iha fatin akontesimentu hodi hasai pasajeiru sira. Vítima sira hotu lori lalais ba Ospitál Rejionál Baucau hodi hetan tratamentu médiku intensivu.
Vítima ida, Gregorio da Silva, esplika katak karreta ne’e la’o ho velosidade maka’as antes akontese asidente.
Nia esplika katak sira halo viajen mai Dili hodi sosa kanu Paralon ba programa PNDS nian. Maibé, durante viajen tomak, kondutór kontinua tula pasajeiru adisionál sira.
Grupu ne’e halo deskansa iha Asalaitula no Kota Lama molok kontinua sira nia viajen. Bainhira liu hosi área Baze Forsa terrestre nian, kondutór foti dalan foun ida, hodi reklama kondisaun estrada nian ne’ebé di’ak liu, ne’ebé ikusmai hamosu asidente ida.
Médiku unidade emerjénsia Horex Baucau, Mario Sarmento, haktuir katak vítima asidente kuaze na’in 19 mak simu no halo ona tratamentu iha fasilidade refere. Vítima sira to’o maizumenus tuku 3:15 lorokraik ho ambulánsia.
Hosi sira ne’e, na’in hitu ho kondisaun grave, enkuantu sira seluk hetan kanek kmaan. Vítima ida ho kanek todan tuir planu sei transfere ba Dili hodi halo tratamentu adisionál.
Vítima sira ne’e maioria adultu no labarik na’in neen. Entretantu, mate isin hosi vítima matebian na’in tolu fila ona ba sira nia knua Nahareka, Postu Administrativu Ossu, hodi hakoi hosi família sira.
Insidente ne’e subliña fali importánsia seguransa transporte nian, partikularmente halo monitorizasaun ba kapasidade pasajeiru no kondisaun veíkulu nian iha rota entre munisípiu sira.
To’o notísia ne’e fó sai, redasaun LIBERDADETL seidauk hetan informasaun hosi Polísia Baucau nian.
