SEGURANSA, (LIBERDADETL.com) — Komandu Polísia Nasionál Timor-Leste (PNTL) hamutuk ho família faluk oan kiak iha loron Segunda-Feira 19 fulan Janeiru 2026, halot ona Saudozo Inspetor Xefe Polísia Duarte Abilio iha semináriu publiku Bekussi.
Saudozo Inspetor Xefe Polísia Duarte Abilio hakotu nia peregrinasaun moris iha loron 17 fulan Janeiru 2026 tuku 01:00 dader madrugada iha Hospital Nasionál Guidu Valadares(HNGV), hafoin hala’o tramentu nia moras.
Saudozo Inspetor Xefe Polísia Duarte Abilio nu’udar Veteranus ida ne’ebé envolve iha organizasaun Santo António ho CNRM-OPJLATIL, luta hasoru okupasaun Indonézia, maibé seidauk hetan rekunesimentu husi estadu Timor-Leste, tanba sei iha prosesu nia laran.
Nune’e iha serimónia funeral ba Saudozo Inspetor Xefe Polísia Duarte Abilio, reprezentante CCLN Munisípiu Dili ho Komandu PNTL entrega bandeira Nasionál ba família ho despaxu Komandu Jerál PNTL nian.
Entretantu iha serminia Funeral ba saudozu Duarte Abilio ne’e partisipa husi Amu Kapelaun PNTL Pe. Abril Lopes, Komandante Sentru Formasaun Polisia Superintendente Polisia Emilio dos Santos ho ofisial superior PNTL no membru Polisia sira hamutuk ho familia faluk oan kiak, iha semiteriu públiku Bekussi.
Biografia Saudozu Inspetor Xefe Polísia Duarte Abilio
Saudozo Inspetor Xefe Polísia Duarte Abilio kodigu “ikun” moris iha loron 15 fulan Agostu tinan 1973, iha suku Clauc, Postu administrativu Fatuberlio Munisípiu Manufahi, Saudozo oan husi aman Duarte Abilio no inan Clementina da Costa, Saudozo ho nia maun alin hamutuk na’in-10, feto nain-5 no mane na’in-5.
Saudozo Inspetor Xefe Polísia Duarte Abilio iha nia jornada moris hala’o nia estudu iha edukasaun formal iha eskola Pre- sekundaria SMP 3 Becora no eskola sekundaria iha SMEA-Negri Becora, Saudozo kontinua nia estudu iha Universidade Nasionál Timor-Lorosa’e (UNTL) remata iha tinan 2003 ho lisensiatura iha area Administrasaun Públika.
Moris nu’udar familia, Saudozo Inspetor Xefe Polísia Duarte Abilio husik hela nia kaben Berta Soares, hanesan vida kazál maromak oferese fuan domin hetan oan lima, Mane rua no Feto tolu ho naran Boa Sorte V. Santana no Juliano V. Santana, oan Feto ho naran Rainha V. A. Santana, Claudia Dea C. Dea Santana no Jenadia N. M. Santana.
Iha tempu okupasaun Indonézia, Saudozo Inspetor Xefe Polísia Duarte Abilio partisipa iha luta ba libertasaun nasionál, envolve iha grupu organizasaun rezisténsia Santo António iha tinan 1990 ate 1998 no iha organizasaun CNRM-OPJLATIL 1998 to’o 1999 kontribui ba luta ukun aan.
Hafoin luta ba ukun an, Saudozo Inspetor Xefe Polísia Duarte Abilio kontinua dedika nia an hodi servi povu no nasaun RDTL liuhosi instituisaun PNTL hanesan kadetes PNTL hahu formasaun Baziku iha loron 01 Fulan Setembru 2003, hetan promosaun ho postu ajente iha loron 29 fulan Dezembru 2003.
Hafoin Saudozo hetan promosaun ho postu ajente, Komandu PNTL halo kolokasaun servisu dahuluk iha Komandu PNTL Munisípiu Dili no iha tinan 2010 liu husi promosaun tranzitório saudozu hetan promosaun, husi postu ajente ba iha postu inspetor asistente iha loron 27 fulan Marsu 2010.
Iha tinan 2015 liú husi promosaun por antiguidade, saudozu hetan promosaun husi postu inspetor asistente ba postu inspetor, saudozo no nia matenek ne’eb´iha hetan fiar husi komandu iha tinan 2015 koloka ba servisu iha komandu PNTL Munisipiu ermera durante fulan 8 hanesan membru iha seksaun investigasaun kriminal.
Iha tinan 2017 saudozu hetan fiar husi komandu PNTL nomea ba kargu komandante eskudra polisia Railaco no xefe seksaun investigasaun kriminal iha komando munisipiu Ermera durante fulan 9.
Iha tinan 2018 saudozu hetan fali kolosaun hodi servisu iha komando Jeral PNTL, iha Diresaun Justisa no Disiplinar, haree ba kareira servisu professional, iha tinan 2020 saudozu hetan kolokasaun servisu iha komando munisipiu Dili, durante tinan rua liu, no hetan fiar hodi sai hanesan komandante Esquadra Cristo Rei durante tinan rua.
Iha tinan 2024 saudozu hetan kolokasaun servisu iha komando munisipiu manatutu durante fulan neen, hafoin iha tinan 2024 fulan Novembru saudozu hetan fali ordem kolokasaun hodi mai servisu iha komando centro de formacao da policia hanesan formador.
Iha tinan 2025 liu husi promosaun tranzitoriu, saudozu hetan promosaun husi postu inspetor ba iha postu inspetor xefe, saudozu kontinua kumpri misaun halo servisu komando centro formacão da policia kuaze tinan ida, haree saudozu nia kondisaun saude komesa la premite ona, hodi hala’o servisu hanesan baibain, hahu iha fulan setembru to’o saudozu husik hakotu nia peregrinasaun moris iha Hospital Nasional Guidu Valabadares (HNGV) iha loron 17 Fulan Janeiru 2026.
Saudozu nia isin bele lakon husi familia no instituisaun PNTL, maibe nia Espiritu no obra ne’ebé nia kontribui sei hamutuk nafatin ho familia no PNTL Adeus… Saudozu Inspetor Xefe Polisia Duarte Abilio Deskansa rohan Laek.
Fontes: Media PNTL
