NOTÍSIA LITERÁRIA, (LIBERDADETL.com) — Primeiru-Ministru Austrália, Anthony Albanese, bolu Prezidente Autoridade Palestina (PA) nian, Mahmoud Abbas, iha tempu ne’ebé públiku fó presaun atu Canberra rekoñese kedas Palestina.
ABC Net fó sai katak telefonema Albanese ho Abbas nian akontese iha loron-tersa (5 Agostu), marka konversa dahuluk entre líder na’in rua dezde Israel lansa nia agresaun hasoru Palestina iha tinan 2023.
Iha telefónika, Abbas hatete ba Albanese katak Austrália iha “papél krusiál” hodi alkansa dame iha Palestina liuhosi rekoñesimentu ba Palestina.
Nu’udar resposta, Albanese afirma katak Austrália nafatin iha kompromisu kleur ona hodi promove solusaun estadu rua nian. Maibé, nia la espesifika bainhira maka Austrália sei rekoñese independénsia Palestina nian.
Iha tempu balun nia laran, Albanese hetan urjente hosi australianu lubuk ida no nasaun sira seluk atu tuir ezemplu hosi Fransa, Reinu Unidu no Kanadá hodi rekoñese soberania Palestina nian iha Asembleia Jerál Nasoins Unidas nian iha fulan-Setembru.
Ministra Negósiu Estranjeiru, Penny Wong, afirma ona katak rekoñesimentu hosi Austrália ba independénsia Palestina nian hanesan de’it kestaun tempu nian. Nia hatete katak rekoñesimentu sei implementa kedas tanba iha risku loloos sira ba destiñu Palestina nian.
“Iha risku ida katak sei laiha Palestina hodi rekoñese bainhira komunidade internasionál la atua hodi kria dalan ida ba solusaun Estadu rua nian”, Wong hatete.
Albanian ho Abbas konkorda ona atu hasoru malu iha marjen hosi Asembleia-Jerál ONU nian iha fulan-Setembru. Seidauk hatene saida maka líder na’in rua ne’e sei diskute iha enkontru ne’ebá.
Hosi: CNC Indonézia (blq/bac)
