NOTISIA LITERÁRIA-NASIONÁL, (LIBERDADETL.com) — Institutu Defeza Nasionál (IDN), reprezenta husi Diretór Administrasaun no Finansas, Dr. Fernando Sousa, hamutuk ho Diretóra Aprovisionamentu, Dra. Domingas Gomes de Deus, partisipa iha semináriu kona-ba Regras Ezekusaun Orsamentu Jerál Estadu (OJE) tinan 2026, ne’ebé realiza durante loron rua, husi loron 8 to’o 9 Janeiru 2026, iha Salaun Ministériu Finansas, Aitarak Laran, Díli.
Semináriu ida ne’e organiza husi Ministériu Finansas, ho objetivu atu fó informasaun no orientasaun ba diretór jerál servisu administrasaun no finansas, no mós diretór aprovisionamentu husi linha ministériu sira hotu, inklui instituisaun ho autonomia finanseru sira , ne’ebé responsabiliza ba planeamentu no ezekusaun orsamentu.
Iha sesaun abertura, Ministra Finansas, Santina Cardoso hateten katak, Ministériu Finansas iha loron 3 Janeiru 2026 komesa ona halo atualizasaun no verifikasaun ba dadus informasaun orsamentu 2026 nian iha sistema, hodi prepara kondisaun atu bele halo ezekusaun orsamentu ho diak no tuir regras ne’ebé vigora.
Ministra Finansas esplika katak semináriu ne’e realiza durante loron rua, atu asegura katak diretór sira hotu iha kuñesimentu kompletu kona-ba regras no lei sira ne’ebé regula ezekusaun Orsamentu Jerál Estadu 2026, inklui Lei Enkuadramentu Orsamentu Jerál Estadu, Lei Jestaun Finansas Públiku, Lei Aprovisionamentu, regulamentasaun relevante sira, no mós Dekretu-Lei Ezekusaun OJE.
Ida ne’e importante liu tan tanba iha balun mudansa no atualizasaun iha lei sira ne’e hodi responde ba necessidade atu aumenta rigor, efisiénsia no responsabilidade iha jestaun finansas públiku.
“Semináriu ne’e halo atu fó kuñesimentu ba diretores sira hotu, atu nune’e sira bele komesa ezekuta Orsamentu Jerál Estadu 2026 ho loloos. Bainhira semináriu remata aban, ami sei loke sistema ba instituisaun hotu atu bele hahú ona ezekusaun orsamentu,” hateten Ministra Finansas.
Iha tinan 2026, Ministériu Finansas introdús mós balun mudansa importante, espesialmente iha área aprovisionamentu. Prosesu aprovisionamentu agora presiza hahú kedas husi inisiu planeamentu, ho hatama informasaun tomak iha sistema, husi planu aprovisionamentu to’o ezekusaun kontratu, liuhosi sistema aprovisionamentu nian, inklui Sistema IPQ, ne’ebé sei lansa ofisiálmente iha tempu badak oin mai.
Sistema IPQ ne’e sei fó oportunidade atu aumenta transparénsia iha jestaun kontratu públiku, no mós fasilita públiku atu bele akompaña prosesu aprovisionamentu tomak, tanba informasaun sira hotu sei dispoñível iha sistema.
Maski nune’e, Ministériu Finansas rekoñese katak iha mudansa ne’e sei hasoru balun difikuldade iha implementasaun. Tanba ne’e, Ministériu Finansas ho nia ekipa sei estabelese Linha Apoiu Servisu Kliente (LPSK) ida, atu fó apoiu ba linha ministériu sira hotu no mós setor privadu, bainhira hasoru problema tekniku ka administrativu, hodi kontinua fasilita ezekusaun Orsamentu Jerál Estadu ba Governu tomak.
Soromutuk ne’e hein atu sai hanesan plataforma ida importante ba koordinasaun, alinamentu polítika no tekínika, no mós atu asegura katak implementasaun Orsamentu Jerál Estadu 2026 lao tuir regra, transparénsia no responsabilidade finanseira tuir lei, hodi apoia dezenvolvimentu institusionál no nasional.
Fontes: Media IDN
