NOTÍSIA LITERÁRIA, (LIBERDADETL.com) — Primeiru-Ministru (PM), Kay Rala Xanana Gusmão fó-hanoin bá delegasaun hosi Indonézia ho Timor-Leste (TL) ne’ebé ohin, tersa (19/08/2025) hahú halo negosiasaun kona-bá Fronteira Marítima (FM) tenke fiar-malu no respeita-malu, nune’e bele hetan rezultadu di’ak bá parte rua.
Mensajen xave ne’e Primeiru-Ministru hato’o bainhira komprimenta delegasaun Indonézia ne’ebé Prezidente Repúblika Indonézia, Prabowo Subianto delega atu ho formalmente hahú negosiasaun iha Otél Palm Spring, Dili.
“Ita bele hahú ona maibé ha’u fó-hanoin bá́ sira katak ita iha nafatin porsaún segmentu ida iha Oecusse. Ha’u husu sira atu fó-hanoin bá́ Governu katak ida ne’ebá ita tenke remata. Maibé Xefe Delegasaun ne’e ninia komentáriu hateten, sira mai ho komitmentu tomak atu halo buat ruma tuir Lei Internasionál no ami dehan negosiasaun hanesan ne’e presiza fiar-malu, respeitu-malu. Tanba ne’e mak ami fiar katak, Indonézia komprometidu tebes atu rezolve problema Fronteira marítima,” PM Xanana esplika.
Xanana Gusmão dehan, kona-bá negosiasaun bá kestaun Fronteira Maritima ne’e nia parte husu ona desde uluk kedan, maibé Indonézia kaer-metin prinsípiu tuir Lei Internasionál katak, Rai mak komanda Tasi.
Nune’e, iha momentu Prabowo Subianto simu pose hanesan Prezidente Repúblika Indonézia nian, PM Xanana hasoru-malu no husu dala ida tán atu realiza negosiasaun ne’e maka hetan kedan resposta pozitivu no ohin bele komesa ona iha Dili.
“Ida-ne’e atu bele hetan buat ruma ne’ebe reforsa tán ita-nia amizade. Ne’e duni, ita hotu hein katak sira komesa ona ho diskusaun, buat ne’e lalais no la kleur demais, la’ós aban bainrua kedan mais iha tempu ne’ebe oportunu sei di’ak tebes bá́ ita hotu,” Xanana Gusmão hateten.
Maski nune’e, líder nasionál ne’e fiar katak, delegasaun ne’ebé hetan konfiansa hosi Prezidente Repúblika Indonézia, Prabowo Subianto mai ho kompromissu ida atu servisu hamutuk no rezolve tuir Lei Internasionál ne’ebé sira opta.
Delegasaun Indonézia iha ema na’in-24 Xefia hosi Laurentius Amrih Jinangkung, S.H.,LL.M nu’udar Embaixadór Repúblika Indonézia nian iha Santa Sé (Vatikanu) no atuál Diretór Jerál Direitu Internasionál no Tratadu sira iha Ministériu Negósiu Estranjeiru Repúblika Indonézia, akompaña hosi Embaixadór Indonézia iha TL, Okto Dorinus Manik.
Delegasaun Timor-Leste nian lidera hosi Diretora-Ezekutiva Gabinete Fronteira Terrestre no Marítima, Elizabeth Exposto akompaña hosi Embaixadór Timor-Leste bá Indonézia, Roberto Soares.
Tuir ajenda, ronda da-huluk negosiasaun Fronteira Marítima entre nasaun rua hahú hosi loron 19 to’o 20 Agostu tinan 2025.
Ofisiál seniór sira hosi nasaun rua sei involve iha diskusaun estruturadu ho objetivu atu delimita Fronteira Marítima permanente ida entre nasaun rua.
(Média-GPM)
