INFO ATUAL-KALAN, (LIBERDADETL.com) — Deklarasaun ida halo ema hakfodak maihosi Superintendente Asistente Julia da Gama, publikamente fó sai abuzu podér sira iha Polísia Nasionál Timor-Leste (PNTL) nia laran.
Iha entrevista eskluzivu iha TVE-Timor, Julia akuza Komisáriu-Jerál Henrique da Costa no Komisáriu Pedro Pedro taka violasaun interna no la konsidera prinsípiu responsabilizasaun institusionál.
Julia fó sai katak relatóriu ofisiál ida kona-ba ofisiál polísia sira ne’ebé uza veíkulu ofisiál ba uzu pesoál iha tempu kalan hodi tula feto, hato’o ona diretamente ba Komisáriu-Jerál Henrique da Costa.
Maibé, relatóriu ne’e ignora lahó akompañamentu investigativu ruma. Tuir Julia, desizaun nonook hosi lideransa másimu nu’udar evidénsia klaru kona-ba kondenasaun ba hahalok desviante iha polísia nia laran.
“Komandante balun uza kareta tula feto iha tempu kalan, no ha’u halo relatóriu ba Komandante-Jerál PNTL Henrique da Costa, maibé la iha investigasaun”, Julia da Gama ko’alia iha TVE-Timor.
Julia nia krítika maka’as la para iha ne’ebá. Nia destaka Henrique da Costa nia desizaun unilateral hodi kansela nia promosaun hosi Superintendente Asistente ba Superintendente Xefi minutu balun antes atu tula deviza ofisiál ba iha nia kabaas. Asaun ne’e haree hanesan vingansa ba nia aten-brani hodi fó sai irregularidade sira iha instituisaun tuir loloos atu tane aas integridade no justisa.
Julia nia deklarasaun hamosu reasaun públiku. Sidadaun sira fiar katak Henrique da Costa nia lideransa lakon ona ninia kredibilidade morál.
Barak akuza PNTL bosok públiku iha prosesu rekrutamentu ba membru foun, ho koluzaun, korupsaun, no nepotizmu ne’ebé deskonfia maka’as halo parte iha sistema.
Kazu ne’e loke hikas debate ne’ebé kleur ona kona-ba transparénsia no reforma iha PNTL nia laran.
Nia afirma katak lahó korajen atu fó sai lia-loos, instituisaun sira aplikasaun lei nian sei kontinua sai hanesan ferramenta podér nian, la’ós protetór ba povu.
