NASIONAL, (LIBERDADETL.com) — Relasiona ho mudansa iha afiliasaun polítika militante Partidu FRETILIN nian iha Munisípiu Bobonaro, ne’ebé muda ona sira-nia apoiu ba partidi Kongresu Nasionál Rekonstrusaun Timor-Leste (CNRT) iha lideransa Kay Rala Xanana Gusmão nian.
Mudansa ida-ne e komprende nu’udar resposta ba komunidade nia esperiénsia empíriku ho dezenvolvimentu husi munisípiu ba nivel nasionál. Uza aprosimasaun kualitativu-analítiku, informasaun ida-ne’e mós ezamina implikasaun eleitorál ba FRETILIN, CNRT, PLP, no KHUNTO, no projeta tendénsia tun iha partilla votu hosi partidu tolu ne’e iha konkursu polítiku iha futuru.
Mudansa iha afiliasaun polítika sai baibain iha demokrasia tranzisaun, partikularmente iha nasaun pós-konflitu hanesan Timor-Leste. Munisípiu Bobonaro sai nu’udar ezemplu konkretu kona-ba oinsá esperiénsia dezenvolvimentu sai nu’udar instrumentu ba lejitimidade polítika.
Militante FRETILIN, ne’ebé uluk forma baze ideolójika partidu nian, agora hatudu tendénsia atu afilia ba CNRT, partidu ne’ebé simbolikamente no pratikamente asosiadu ho estabilidade nasionál no dezenvolvimentu sustentável.
Afiliasaun militante FRETILIN no PLP nian ba CNRT iha ligasaun metin ho persesaun kona-ba susesu dezenvolvimentu ne’ebé komunidade lokál esperimenta diretamente. Infraestrutura bázika, konetividade munisípal, no programa sosiál konsidera hanesan relativamente konsistente dezde CNRT kaer kontrolu ba governu nasionál.
Situasaun ida ne’e hamosu narrativa polítika ne’ebé forte katak dezenvolvimentu sustentavel só bele garante bainhira CNRT kontinua lidera nasaun ne’e.
Partidu polítiku nu’udar vazu ideolójiku, instrumentu ajitasaun nian ne’ebé konsolida esperiénsia materiál povu iha konxiénsia polítika foun ida. CNRT utiliza memória koletiva luta nasionál no artikula iha propaganda ba dezenvolvimentu iha futuru.
Antonio Barreto, militante FRETILIN ne’ebé oras ne’e afilia ona ba partidu CNRT, ba LIBERDADETL:
“Ida ne’e hanesan ha’u nia mehi ida, hare ho matan rasik katak ema afilia tanba hetan ona esperiensia dezenvolvimentu iha munisípiu Bobonaro.Ami nia esperansa simples: loron ida, katak dezenvolvimentu sei to’o iha area remotas bainhira CNRT kontinua lidera nasaun ne’e ba tinan lima oin mai.”
Deklarasaun ida-ne’e reforsa argumentu katak esperiénsia empíriku maka desizivu liu hodi determina opsaun polítika duké lealdade istóriku. Nune’e mós, Carlos Pereira avalia katak “mudansa iha afiliasaun iha Bobonaro hatudu transformasaun rasional ida hosi eleitor sira, iha ne’ebé dezenvolvimentu sai hanesan sasukat prinsipál hosi lejitimidade podér nian.”
Iha konfigurasaun eleitoral oin mai, iha posibilidade katak CNRT sei hetan kuota votu médiu aas liu porsentu 50 kompara ho FRETILIN. Entretantu, PLP ne’ebé lidera hosi Taur Matan Ruak, projeta atu manan entre pursentu 25 no 72, no KHUNTO iha pursentu 80. Maibé, análize krítiku indika katak partilla votu hosi partidu tolu ne’e provavelmente sei tun tanba saturasaun polítika, fragmentasaun hosi baze massa, no aumentu hosi setisizmu públiku ba promesa kampaña nian.
Deklíniu ida-ne’e la’ós nesesariamente hafraku CNRT estruturalmente, maibé indika katak lejitimidade dezenvolvimentu tenke kontinua kria fali liuhosi polítika konkreta, la’ós retórika polítika de’it.
Afiliasaun militante FRETILIN ba CNRT iha Munisípiu Bobonaro reflete mudansa paradigma politika bazeia ba esperiensia dezenvolvimentu.
CNRT ho susesu artikula ona dezenvolvimentu nu’udar instrumentu propaganda ida ne’ebé efetivu atu mantein apoiu polítika entre partidu sira. Maibé, dinámika eleitorál hatudu katak laiha partidu ida maka imunidade ba votu ne’ebé tun.
Sustentabilidade lideransa CNRT nian iha tinan lima oin mai sei determina barak liu hosi ninia abilidade atu to’o iha área remota no tradús planu nasaun ba realidade sosiál ne’ebé diretamente sente hosi povu.
