INFO ARKIDIOCESE NO DIOCESE, (LIBERDADETL.com) — Ho fuan nebe nakonu ho ksolok no gratidao, Conferência Episcopal Timorense convida sarani sira hotu atu mai participa iha Santa Missa Ação de Graças nian, ba ocasião primeiro aniversário visita Sua Santidade Papa Francisco nian mai rai doben Timor-Leste.
Ita nia fuan no neon sei manas hela hodi hanoin presença histórica Maktoban Papa Francisco nian iha ita rain, iha loron 9 to ‘o lorn 11 fulan Setembro tinan 2024. Papa nia visita sai nudar bênção ida ba ita nia nação no liu hosi nia encontro sira ho ukun nain sira, ho katuas no ferik sira, ho foinsa’ e sira, ho labarik sira no ho ema moras sira, hatudu duni kata Papa nia domin boot povo Timor nebe simples no fiar nain.
Nia presença iha ita nia le’et, hametin liu tan ita nia fiar, hafoun fila fali ita nia esperança no nia husik hela marca ida nebe labele hasai hosi ita hotu nia fuan.
ha data especial ida ne’e, mai ba ita hotu tau hamutuk ita nia oração atu agradece ba Maromak ba graça hosi presença Santo Padre nian iha ita le’et, ba nia liafuan sira nebe fo coragem mai ita no ba gesto concreto sira nebe hatudu nia domin paterno, proximidade no atenção nebe nia fo mai ita Timor oan hotu. Molok nia fila hikas ba Roma, iha encontro ho foinsa’e sira nia husik hela menon ida ne’e: “Obrigado ba imi nia presença. Ha’ sei husik hela rai ida ne’e, nebe nakonu ho hamnasa, ho imi nia oin midar sira no ho esperança katak imi hotu iha ha’u nia fuan. Maromak haraik bênção ba imi hotu”.
No Papa declara iha nia viagem fila ba Roma, ho liafuan murak ida ne’e: Hau nia laran monu tiha ona ba Timor- Leste”.
Tan Papa nia domin ida bo’ot nune’e, ita fiar katak oras ne’e Maktoban Papa Francisco, harohan hamutuk ho Santo no Santa sira iha Lalehan mai rai no povo doben Timor-Leste.
Ba ida ne’e, imi hotu nia participação iha Missa Ação de graças ne’e mak sai nudar sinal domin, unidade no sasin moris ita nia fiar nian.
Santa Missa Açao de Graças, sei hala’o iha:
Loron : Quarta-feira, 10 de setembro de 2025
Horas : 18h00
Fatin : Esplanada de Tasi-Tolu
Santa Missa sei preside hosi : Dom Virgilio Cardeal do Carmo da Silva, SDB. Arcebispo de Dili e Pró-Presidente da CET.
Mai ba, ita celebra hamutuk momento histórico ida ne’e nakonu ho fiar, ksolok no gratidão.
Conferéncia Episcopal Timorense, Dili, 05 de Setembro de 2025
Assinado
Dom Norberto do Amaral
Bispo de Maliana e Presidente da CET
