INFO ATUAL-KALAN, (LIBERDADETL.com) —Governu prepara hela atu halo rotasaun lideransa Polísia Nasionál Timor-Leste (PNTL). Ofisiál superiór na’in rua, Komandante ho inisial AdJ no NEM, iha tempu badak sei hetan nomeasaun hodi lidera instituisaun seguransa nasionál, hodi troka Komisáriu-Jerál Henrique da Costa no Komisáriu Pedro Belo.
Fonte ida ne’ebé konfirma haktuir katak, desizaun ofisiál ne’e sei diskute no aprova iha reuniaun Konsellu Ministru nian iha kuarta-feira (semana ne’e). Mudansa ne’e parte ida husi PNTL nia esforsu reestruturasaun interna hodi hametin efikásia, profisionalizmu, no estabilidade instituisaun polísia nasionál nian.
Komandante AdJ, ne’ebé koñesidu ho ninia esperiénsia iha operasaun no seguransa públika, tuir informasaun iha liña atu asumi kargu nu’udar Komisáriu Jerál PNTL. Entretantu, Komandante NEM, ofisiál ida, projeta atu okupa pozisaun estratéjiku iha nivel komandu sentrál.
Observadór balun haree movimentu ne’e hanesan sinál ida reforma estrutura lideransa PNTL, ho esperansa atu hasa’e konfiansa públiku iha aplikasaun lei.
Prosesu tranzisaun ne’e sei hala’o tuir orden no tuir regulamentu aplikavel, hodi garante kontinuidade kna’ar no responsabilidade iha seguransa nasionál.
Desizaun finál kona-ba nomeasaun ba ofisiál na’in rua ne’e sei fó sai ofisialmente hafoin hetan aprovasaun hosi Konsellu Ministru.
