NOTÍSIA LITERÁRIA, (LIBERDADETL.com)— Selesaun Nasionál Timor-Leste U-23 ofisialmente despede públiku iha eventu despedida ne’ebé hala’o iha salaun Xanana Sport Center, 10 Jullu 2025, nu’udar preparasaun ba sira-nia dezlokasaun ba jogu ASEAN U-23 Championship Mandiri Cup™ 2025, iha Jakarta, Indonézia.
Eventu ne’ebé hala’o iha ambiente animadu no amigavel ne’ebé lidera husi Diretór Tékniku Interinu FFTL nian, Gaspar Quintão, Diretór Arbitrajen FFTL José Fonseca. Durante eventu ne’e, FFTL hato’o mensajen apoiu no motivasaun ba eskuadra juvenil Timor-Leste tomak, hodi enkoraja sira atu mantein disiplina no espíritu nasionalizmu hodi hasoru jogu sira.
Antes sira nia partida ne’ebé marka ona iha loron 14 fulan Jullu, ekipa ne’e mós aproveita tempu hodi hala’o vizita kortezia ba mahein FFTL São Dom Bosco iha edifísiu FFTL, nu’udar sinál apresiasaun ba estrutura téknika no administrativa tomak ne’ebé fó ona apoiu tomak ba sira.
Gaspar Quintão subliña importánsia integridade, serbisu iha ekipa, no konfiansa iha jogu hotu-hotu.
“FFTL fó fiar tomak ba jogadór sira, nune’e nafatin hala’o esforsu ba hodi tane Timor-Leste nia naran iha mundu futebol, nafatin sauda susesu ba ekipa tomak espera bele hetan rezultadu pozitivu ba Nasaun,” nia hatete ba jogadór sira no ekipa treinadór sira ne’ebé marka prezensa.
Selesaun Timor-Leste U-23 nia partisipasaun iha ASEAN U-23 Championship Mandiri Cup™ 2025 hanesan marku signifikativu ida ba dezenvolvimentu futeból nasionál.
Kompetisaun ne’e sei hala’o iha loron 15 to’o 31 fulan-Jullu iha Estádiu Prinsipál Gelora Bung Karno no Estádiu Patriot Candrabhaga iha Jakarta.
Timor-Leste tama iha Grupu C hamutuk ho poténsia futeból rejionál rua, Tailándia no Myanmar. Maski hasoru adversáriu maka’as, FFTL espresa otimizmu katak sira-nia espíritu luta no servisu maka’as sei sai motor xave hodi alkansa rezultadu ne’ebé impresionante.
Ho saída ne’e, FFTL ofisialmente entrega responsabilidade ba jogadór foin-sa’e sira atu lori Timor-Leste nia naran di’ak iha palku internasionál, enkuantu husu orasaun no apoiu tomak husi komunidade. Selesaun Nasionál U-23 partisipa eventu ne’e hanesan símbolu ida hosi esperansa no orgullu ba jerasaun futebolista iha futuru.
