INFO ARKIDIOCESE NO DIOCESE, (LIBERDADETL.COM) — Vigário Episcopal Assunto Social no Educação, Pe. Evaristo António preside missa agradecimento hodi comemora tinan 26 existência Caritas Diocesana Baucau (CDB) iha loron 08 fulan Julho tinan 2025, iha Capela CDB.
Iha homilia, Pe. Evaristo husu ba funcionário sira atu continua missão CDB nian, iha nebé lori Maromak ba ema hotu-hotu liu-hosi ação caritativa sira no lori fila ema ba Maromak. No wainhira iha situação difícil iha serviço karik keta haluha halo oração.
Missa remata tiha, Pe. Hipólito Soares lori Diocese Baucau nia naran hato’o parabéns ba CDB no husu atu funcionário sira consciente nafatin katak CDB nudár departamento ida hosi Diocese Baucau (DB). Tan ne’e iha ação CDB nian tomak sempre lori Diocese Baucau nia naran.
Diretor CDB, Pe. Justino Afonso mos hato’o obrigado ba presença clero sira, religiosa, parceiro CDB nian, inan-aman, professor, estudante pre-primária São João Paulo II no funcionário balun departamento governo central DB nian. Pe. Justino mos hateten, “Padre, Madre, parceiro no ita hotu nebé marca presença iha ne’e nudár motivação ba ami katak ami la la’o mesak maibé ita la’o hamutuk, la’o hamutuk ho Bispo Baucau no la’o hamutuk nudár Diocese Baucau”.
