OPINIAUN, (LIBERDADETL.com) — Hondra boot, nakonu ho orgullu no laran haksolok mak ita hotu hamutuk iha Colégio de São José Operário-fatin kuru no fahe matenek, hodi selebra loron vigésima quarta restauração da independência ba ita-nia rai doben, República Democrática de Timor-Leste. Loron ne’e la’os de’it data ida iha calendário, maibé momento importante ida ne’ebé fó hanoin mai ita kona-bá coragem, aten berani no determinação hosi povu hotu ne’ebé luta, terus no nunka lakon esperança hodi haree ninia mehi Liberdade sai realidade.
Tinan 24 liu ba, ita-nia rain hamrik fila-fali, livre no ukun-an, hafoin liu hosi dalan naruk no difisil ida ne’ebé marka ho sacrificio bo’ot husi ita-nia beiala sira, mane no feto ne’ebé fó sira-nia tempu, luta no to’o fo sira nia an rasik atu ita, gerasaun sira agora, bele moris iha nasaun ida independente, democrático no paz. Ohin, bainhira ita selebra loron ida ne’e, ita hatudu ita nia onra ba ema hotu ne’ebe hari’i nasaun ida ne’e ho luta no domin ba Timor-Leste. Sira nia memoria sempre moris iha ita nia fuan no matadalan ba ita ninia passo sira.
Nudar Diretur iha Colégio ida ne’e no hanesan sidadaun Timor-Leste ida ho berani hatete katak edukasaun hanesan pilar importante liu hodi hametin no fortifika ita-nia independência ida ne’e.
Liberdade ne’ebé ita hetan la’os para deit ho memória ka ho selebrasaun, maibé ita presiza hari’i liu husi loron-loron, liu husi conhesimento, formasaun no dezenvolvimentu ba ita-nia abilidade sira. Iha colégio ida ne’e, ita iha missão klaru ida ne’e mak: prepara imi ida-idak, estudante doben sira, atu sai sidadaun ne’ebé hatene ninia dever no direito, ne’ebé iha liberdade maibe mos iha responsabilidade, no bele kontribui ba progresu rai doben ida ne’e, defende valor diak sira ne’ebé ita iha, ita-nia cultura no ita-nia identidade.
Meu senhores, minhas senhoras e queridos estudantes iha tinan 24 nia laran ne’e, Timor-Leste tama iha dalan ida cresimento no desenvolvimento. Loos duni ita hasoru desafios oin-oin, basa atu hari’i nação ida ne’ebé diak no nabilan nudar serviço ne’ebé todan no deficil, maibé ita la para iha fatin. Ita bele hare iha area educação, iha avanço ne’ebé barak: Eskola barak loke tan, asesu ba educação mos barak liu tan iha rai laran no rai liur, professor sira ne’ebé iha qualificado, no oportunidade barak liu tan ba labarik no jovem sira. Maibé ita hatene katak sei iha tan buat barak mak tenke halo. No iha ne’e, iha Kakuluk São José Operário, iha sala de aula sira, iha espaço ba convivio sira mak ita hahu buat foun ba future ida ne’ebé diak liu.
Ba oan doben estudante, ho domin no ho laran tomak hau dehan ba imi: Imi mak futuro nação ida ne’e. independência ne’ebé ohin ita selebra mak imi-nia riku soin, no imi mak tenke quidado no halo diak liu tan. Nune’e estuda ba: estuda ho dedicação, aprende ho hakaas an, valoriza oportunidade hotu ne’e imi iha atu aprende, basa koñesimentu sira ne’ebé imi hetan, nudar passo no bokae ida ne’ebé atu halo Timor-Leste ne’ebé desenvolvido liu, justo liu no rico liu tan iha imi nia tempu. Respeitu imi-nia professores sira, hadomi, hamtauk imi-nia aman inan sira, amigavel ho kolega sira hotu, no sempre hamoris valor sira hanesan solidariedade, paz, tolerância no unidade-nudar valor ne’ebé mak sai klamar ba ita-nia rain.
Ba professor no funcionário sira iha eskola ne’e, agradese wain ba ita bo’ot sira. Imi mak dalan, mestre, ne’ebé ho dedicação no laran haksolok, laos deit transmite conhecimento, maibé mos sai hanesan base principio sira ne’ebé forma karakter estudante sira nian. Imi-nia serviço importante tebes, no imi-nia esforsu kontribui direitamente ba harii ita-nia nação. Ita kontinua servisu hamutuk hanesan ekipa ida, atu fob a ita-nia estudante hotu edukasaun ho kualidade ne’ebé loke odamatan no fó ferramenta sira ba sira bele manan susesu iha moris.
Ohin, wainhhira ita selebra loron ksolok ba dala rua nulu resin haat Restaurasaun Independência ita-nia rain, mai ita renova ita-nia kompromisso ho rai doben ida ne’e, mai lulik no santo ida ne’e: kompromisso atu servisu ho domin, servisu ba edukasaun, servisu ba paz, servisu ba unidade no servisu ba desenvolvimentu. Timor ida ne’ebé diak, hein hela ita. Assim seja!
Viva Timor-Leste
Viva Povo Maubere
Viva Colégio São José Operário Balide!
